1 mijë euro gjobë për kafe ‘të shtrenjtë’ – Policia italiane ‘dënon’ lokalin në Firenze për tarifa të larta!

Një bar kafe në Firence është gjobitur me 1000 euro pasi një klient i zemëruar thirri policinë për t’u ankuar për çmimin e një pije të nxehtë. Bar-kafeja Ditta Artigianale në Firence u dënua të hënën pasi nuk afishoi çmimin e një filxhani kafeje në banakun e tyre.

Një klient kishte telefonuar policinë lokale, i mërzitur që një filxhan kafe pa kafeinë kushtonte 2 euro. Sipas Ditta Artigianale, kafeja në fjalë kishte origjinën nga një plantacion meksikan dhe ishte “përgatitur me shumë kujdes nga baristët”.

Në Itali, kostoja mesatare e një ekspres është rreth 1 euro, megjithëse shumë bare kanë rritur çmimet këtë vit. Pronari i lokalit tha se ishte “gati të paguante për gabimet e tij”, por kritikoi ligjin dhe gjobën, duke thënë se çmimi ishte shfaqur në një menu dixhitale.

“Besoj se me gjithçka që serviret në lokale sot, ky ligj ka kaq shumë absurditet dhe duhet ndryshuar, përndryshe 99.9 % e lokaleve dhe restoranteve do të ishin lehtësisht gabim”, shkruan Francesco Sanapo në Facebook.

Bar kafeja Ditta Artigianale është e mirënjohur në qytetin toskan dhe ka fituar disa konkurse për përgatitjen e kafesë.

E . S  / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.