1 në 4 të rinj as punon e as studion – Meshkujt më aktivë se femrat në tregun e punës
Të dhënat më të fundit të Institutit të Statistikave mbi tregun e punës në vendin tonë për vitin 2019 tregojnë se norma e të rinjve të cilët as punojnë e as studiojnë ka rënë lehtë, në 26.6%, nga 28.6% që ishte vitin paraardhës. Por, pavarësisht rënies, rreth ¼ e të rinjve të moshës 15-29 vjeç praktikisht nuk kryen asnjë lloj aktiviteti. Në raportin e këtij viti, Instat jep edhe arsyet kryesore.
Rreth 36.5% e tyre janë pjesë e kësaj kategorie pasi janë të papunë, pra nuk mund të gjejnë punë, pavarësisht faktit se mund të kenë arsimin e duhur. Inaktivët janë rreth 32%. Një pjesë e konsiderueshme, rreth 18%, jep arsyet familjare se përse nuk bën asgjë, pra as punë e as shkollë, apo trajnim. Rreth 12.7% ndërkohë rezultojnë të jenë të dekurajuar, qoftë për të studiuar, qoftë për të punuar.
Të dhënat tregojnë gjithashtu se, meshkujt janë më aktiv se femrat, pasi përqindja e atyre që janë në kërkim të një pune, është bindshëm më e lartë se te femrat. Nga ana tjetër, ndërkohë që për meshkujt norma e atyre që zgjedhin të mos punojnë apo shkollohen për përgjegjësi familjare është 2.3%, te femrat ngjitet në rreth 31.5%.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.