1 Qershori, Dita e Fëmijëve – Shoqëria civile: 100 mijë vogëlushë në varfëri. Koha për përgjegjësi

Pavarësisht premtimeve të shumta për çështjet e lidhura me fëmijët, ende mbetet shumë për t’u bërë. Shqipëria ka mbi 100 mijë fëmijë të cilët jetojnë në varfëri dhe 1   në dy fëmijë është viktimë e dhunës në familje apo në shkollë. Me rastin e 1 Qershorit  Shoqëria Civile i është drejtuar institucioneve shqiptare me anë të një letre duke kërkuar më shumë përgjegjësi për fëmijët.

“Shqipëria ka mbi 100 mijë fëmijë që jetojnë në varfëri, me mijëra fëmijë janë të braktisur, të neglizhuar dhe nuk jetojnë fëmijërinë e tyre. Ata lypin, shesin, janë viktima të dhunës, shfrytëzimit, trafikimit, apo prostitucionit. Një në dy fëmijë janë viktima të dhunës fizike në familje apo në shkollë”, u shpreh Altin Hazizaj, Kreu i CRCA.

Hazizaj shtoi se ende mungojnë planifikimi i duhur për fëmijët. Hazizaj u shpreh për mediat se nuk ka buxhet, programe të arsimit dhe integrimit në komunitet për fëmijët në konflikt me ligjin.

“Ende mungon planifikimi i duhur, buxhetimi dhe programet për integrimin në komunitet të fëmijëve në konflikt me ligjin. Ne ende nuk kemi bërë një zgjedhje funksionale për sa i përket kujdesit dhe kujdestarisë së fëmijëve. Ne, një grup i gjerë i organizatës së shoqërisë civile, jemi sot bashkë për të kërkuar nga Kuvendi i Shqipërisë, Qeveria, Presidenca dhe Bashkitë në të gjithë Shqipërinë: “Bëni detyrën tuaj për fëmijët, merrni përsipër përgjegjësitë tuaja”. Për të pasur fëmijë të shëndetshëm, të arsimuar dhe të mbrojtur, është koha që të gjithë të marrim përsipër përgjegjësitë tona në mënyrë që të veprojmë për mbrojtjen dhe zhvillimin e tyre”, tha Hazizaj.

Në Indeksin “Fundi i Fëmijërisë” Shqipëria renditet në vendin 71 nga 172 vende të vlerësuara në gjithë botën. Pozicionimi në vendin e 71-të tregon se në Shqipëri ka ende disa fëmijë  me probleme sociale.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.