10.9 miliardë lekë taksa nga dividendi – Bizneset shpërndanë vetëm një pjesë të fitimeve të “ngrira”
Në 9 muajt e këtij viti, tatimet kanë mbledhur vetëm nga dividendi të ardhura rekord në vlerën e 10.9 miliardë lekëve, apo 3 herë më shumë se i gjithë vitit 2018. Kompanitë e mëdha kanë përfituar nga oferta e qeverisë dhe kanë shpërndarë rreth 137 miliardë lekë fitime me nivel tatimor prej 8 për qind nga 15 për qind që është normalisht.
Të dhënat e tatimeve i përkasin periudhës Janar-Shtator 2019. Por sa efekt ka pasur “oferta” e qeverisë në raport me fitimet e ngrira? Sipas të dhënave të Ministrisë së Financave, fitimi i pashpërndarë nga kompanitë e mëdha vetëm për periudhën 2015-2017 llogaritej në 393 miliardë lekë, i cili ishte targetuar nga masa lehtësuese e qeverisë, por që mesa duket sërish kompanitë kanë hezituar dhe kanë vendosur të shpërndajnë vetëm 34.9 për qind të këtij totali, pa llogaritur këtu vitet e tjera.
Megjithatë fitimi i shpërndarë është më më shumë se 5 herë më i lartë se ai që është shpërndarë gjatë vitit 2018 i llogaritur ne afro 24.7 miliardë lekë. Tatimi mbi dividendin për fitimet e pashpërndara të realizuara në vitin 2018, përfshirë rezervat dhe fitimet e kapitalizuara, u aplikua në shkallën tatimore 8%, për pagesat e kryera brenda datës 20 gusht 2019.
Ulja e tatimit mbi dividendin u vendos në paketën fiskale 2019, për shkak se një pjesë e madhe e kompanive i kishin ngrirë fitimet e tyre, duke mos dashur që të paguanin 15 për qind. Para ndërmarrjes së kësaj iniciative rezultonte se vetën 11 për qind e bizneseve të mëdha shpërndanin dividendin. Kjo masë u kundërshtua nga opozita me argumentin se po favorizohen oligarkët.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.