10 akse të reja rrugore në këtë bllok banimi në Tiranë – Projekti do të kushtojë 166 mln lekë
Bashkia e Tiranës ka çelur zyrtarisht tenderin për rikonstruksionin e infrastrukturës rrugore në bllokun që kufizohet nga rruga “Demi Nazeri”-“Princ Vidi”-“Gjok Doci.”
Fondi limit pa TVSH për këtë investim është caktuar 166 milionë lekë, ndërsa punimet janë parashikuar të realizohen brenda 5 muajve kalendarikë. Ndërkohë, ofertat nga operatorët ekonomikë për këtë tender do të priten deri më datë 4 mars 2018.
Projekti përshin ndërhyrje thelbësore në sistemin rrugor dhe infrastrukturën nëntokësore të këtij blloku. Më konkretisht, do të realizohen 10 akse rrugore me gjatësi të ndryshme të cilat do të vihen në funksion të automjeteve dhe këmbësorëve.
Pjesë e projekti do të jenë gjithashtu edhe realizimi i trotuareve në të dy krahët e rrugëve, kanalizimin e ujërave të shiut si dhe vendosjen e sistemit të ndriçimit rrugor. Duke qenë se aktualisht është pjesërisht i realizuar sistemi i furnizimit me ujë të pijshëm, është parashikuar realizimi i pjesës së mbetur.
Ndërkohë, investimi do të përfshijë edhe disiplinimin dhe sistemin e plotë të ujërave sipërfaqësore në të gjitha segmentet ku ndërhyhet përmes vendosjes së pusetave. Për realizmin e rrjetit të pusetave të ujërave të shiut është parë si domosdoshmëri ndërtimi i një kolektori kryesor të ri me shkarkim në lumen Lana.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.