10 mln usd për vaksinat kineze. Qeveria miraton shtesën e fondit pas nënshkrimit të marrëveshjes me distributorin turk
Këshilli i Ministrave ka miratuar një shtesë fondi për Ministrinë e Shëndetësisë dhe Mbrojtjes Sociale, që do të shkojë për vaksinat kineze anticovid-19. Në total shtesa e fondit është 10 milion dollarë, ndërsa vendimi specifikon se vlera është sipas kushteve të përcaktuara në marrëveshjen ndërmjet palëve për vaksinën Coronavac, të prodhuar nga kompania Sinovac. Sipas deklaratave të kryeministrit Edi Rama, në total marrëveshja përfshin 1 mln doza vaksinë, çka do të thotë se për herë të parë kemi të dhëna edhe mbi çmimin që kushton një dozë. Kjo pasi marrëveshjet për blerjen e vaksinave janë konsideruar si sekret tregtar, duke mos publikuar të dhëna mbi çmimin, sasinë apo periudhën e mbërritjes së tyre në vendin tonë. Praktikisht, një dozë e vaksinës Coronavac ka kushtuar 10 USD, ndërkohë që në datën 25 mars mbërritën në Shqipëri 192 mijë doza. Marrëveshja me distributorin turk të autorizuar për vaksinën e COVID-19 Coronavac, të krijuar nga kompania Sinovac dhe prodhuar në Kinë u miratua para disa ditësh, ndërsa nënshkrimi i erdhi, pasi qeveria shqiptare i hapi rrugën përdorimit të vaksinave anticovid-19, që nuk janë të certifikuara nga agjencia amerikane dhe europiane e barnave. Ky ishte një ndryshim i fortë në qëndrimin e qeverisë shqiptare, që kishte shprehur vendosmërinë për të mos lejuar përdorimin e këtyre vaksinave. Aktualisht, në vendin tonë kanë mbërritur në total 282 325 doza, nga të cilat: 38 400 Astrazeneca, 10 mijë Sputnik V, 41 925 Pfizer dhe 192 mijë janë vaksina të Sinovac.
VAKSINAT QË KANË MBËRRITUR NË VENDIN TONË
Pfizer 41 925 doza
AstraZeneca 38 400 doza
Sputnik V 10 000 doza
Sinovac 192 000 doza
TOTAL 282 325 doza
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.