10 vjet Kosovë e Pavarur – Rama: Dy vendet me president të përbashkët, simbol i unitetit
Në seancën e posaçme të mbajtur në Kuvendin e Kosovës me rastin e 10-vjetorit të Pavarësisë, Kryeministri Edi Rama tha se dy vendet tona duhet të ndjekin një politikë të jashtme të përbashkët. Ai foli gjithashtu për një President të përbashkët simbol të unitetit kombëtar.
Në fjalën para deputetëve kosovarë, Rama u ndal edhe te hapat e mëtejshëm që duhet të hidhen në rrugën e unifikimit të sistemit arsimor mes dy vendeve, në lehtësimin e shkëmbimeve doganore e e tregtare.
“Kosova dhe Shqipëria do të kenë një politikë të jashtme, e jo veç ambasada dhe përfaqësi diplomatike të njëjta, por pse jo një President simbol të unitetit kombëtar dhe një politikë kombëtare të sigurisë. Mbase ky parafytyrim sot mund të mos jetë i këshillueshëm në rrafshin e racionales, por historia për të cilën mora leje qysh në fillim për të mos folur sot, na këshillon se çka është e drejtë të ëndërrohet, nuk është e pamundur të realizohet“, u shpreh Rama.
Në seancën e posaçme për 10-vjetorin e Pavarësisë së Kosovës merrnin pjesë edhe Presidenti i Republikës së Shqipërisë Ilir Meta, Kreu i Kuvendit Gramoz Ruci, Kreu i Opozitës Lulzim Basha, si dhe ish Kryeministri Sali Berisha.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.