“100 fshatrat”, Peleshi në Holandë: Mundësi për të investuar, holandezët interes për tu përfshirë në këtë projekt
Shqipëria ofron shumë mundësi investimi në sektorin e bujqësisë. Ministri i Bujqësisë Niko Peleshi i bëri të ditura këto mundësi gjatë vizitës zyrtare në Holandë, ku u takua me homologun holandezë, si dhe vizitoi edhe universitetin nr. 1 në botë për inovacionin në bujqësi, Vvagenigen University. Peleshi u ndal edhe te integrimi i Shqipërisë në Bashkimin Europian, ku theksoi se vendi ynë po bënë të gjitha përpjekjet për të treguar se e meriton anëtarësimin.
“Takimi me bizneset në Holandë është mjaft i dobishëm për Shqipërinë. Shpresojmë që kjo vizitë do na shërbejë për të ndërtuar ura bashkëpunimi midis Shqipërisë dhe Holandës në fushën e bujqësisë, agropërpunimit dhe zhvillimit rural. Jemi të gjithë duke u përpjekur që ti tregojmë Europës dhe BE se sa e interesuar është Shqipëria që ta meritojë anëtarësimin e plotë në BE. Ne presim hapjen e negociatave. Holanda është një vend i rëndësishëm, që duhet bindur për rrugën tonë të reformave, siç është reforma në drejtësi por edhe reforma strukturore në shumë sektorë të tjerë, Pra ne meritojmë që Europa të hapë dyert e veta për të na dhënë mundësinë të ecim shumë shpejt drejt integrimit të plotë. Kjo vizitë pati rëndësi për bujqësinë, por i shërbeu edhe axhendës së përbashkët së shoqërisë shqiptare, për integrimin europian”, tha ministri Peleshi.
Ministri Peleshi foli dhe për projektin e “100 fshatrave”.
“Nga kontakti që pata me arkitektët holandezë pashë edhe interesin e tyre për tu përfshirë në projekt. Shpresoj që do të mund të ndërtojmë një pasaportë projektesh për çdo fshat, për secilin nga 100 fshatrat”.
Ai njohu të pranishmit me rihapjen e afërt te procesit të dhënies me qira të tokave bujqësore pas auditimit të muajve të fundit, dhe te programit IPARD, prej 94 milionë euro, të cilat do të jenë në dispozicion të investitorëve vendas dhe të huaj.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.