“100 Fshatrat”, Peleshi prezanton programin në Austri: Do të krijojë tregje dhe vende të reja pune
“Programi 100 Fshatrat” do të krijojë vende të reja punë si dhe do të krijojë njëkohësisht mundësinë e hapjes së tregjeve të reja.” Kështu është shprehur ministri i Bujqësisë dhe Zhvillimit Rural, Niko Peleshi, gjatë prezantimin të programit në konferencën e 14-të Europiane të Rajoneve dhe Qyteteve “Europë 1918-2018-2118” në Salzburg të Austrisë.
“Këto fshatra nuk janë fshatra, të cilat kanë më shumë probleme dhe nevoja sesa të tjerët. Ata janë fshatra që kanë më shumë potenciale se sa te tjerat. Dhe ne po përpiqemi të ndërtojmë njëqind modele shkëlqimi, fshatra të së ardhmes. Dhe të japim pilulën për të sjellë më shumë shpresë dhe perspektivë në këto fshatra”, tha Peleshi.
Sipas Peleshi, programi është dizajnuar në mënyrë të tillë që përmes ndërhyrjeve në përmirësimin e infrastrukturës, nxitjen e aktivitetit bujqësor dhe agroturistik, zgjimin e aktivitetit kulturor etj, të ndërtohen 100 modele që do të shtojnë shpresën e banorëve dhe sipërmarrësve për një të ardhme më të mirë.
“Duke mbështetur agroturizmin, ne jemi duke siguruar treg, vende pune të qëndrueshme për fermerët. Pra, kjo është një mënyrë, se si ne po ndërtojmë, apo le të themi po nxisim ekonominë bujqësore, por jo vetëm aktivitetet bujqësore, dhe nga ana tjetër pyetja e dytë, si të nxisim entuziazmin në zonat rurale dhe kjo është diçka që ne nuk mund ta bëjmë vetëm”, shtoi ndër të tjera ministri Peleshi.
Programi “100 Fshatrat”, është një nismë e qeverisë shqiptarë e ndërmarrë me qëllim zgjerimin e ekonomisë në zonat rurale.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.