$11 mijë pasuri për frymë, Credit Suisse: Pakësohen të varfërit dhe të pasurit, fryhet shtresa e mesme
Credit Suisse publikoi të Enjten raportin e plotë të pasurisë globale, që është një dokument unik në llojin e tij për të analizuar pasurinë dhe shpërndarjen e saj në të gjitha ekonomitë e botës.
Raporti fillestar tregonte se, pasuria e shqiptarëve është rritur në 24 miliardë dollarë, nga 22 miliardë dollarë të një viti më parë. Të dhënat e reja e zbërthejnë në detaj këtë shifër, dhe fillimisht tregojnë se, pasuria mesatare e shqiptarëve është rritur në 11,061 dollarë për frymë, nga 9997 dollarë për frymë të një viti më parë, çka përkthehet në një rritje të pasurisë me rreth 1100 dollarë për frymë.
Shifrës i është aplikuar edhe ndryshimi i kursit të këmbimit si dhe efekti inflacion. Credit Suisse e paraqet shpërndarjen e pasurisë në bazë të tre kategorive; atyre që kanë një pasuri nën 10 mijë dollar, atyre që kanë një pasuri nga 10 mijë deri në 100 mijë dollarë, dhe ata që kanë një pasuri nga 100 mijë deri në 1 milion dollarë.
Ajo që vihet re që në fillim, në krahasim me një vit më parë është fakti se, si kategoria e parë, e atyre që kanë më pak se 10 mijë dollarë, si ajo e të pasurve është tkurrur ndjeshëm, për t`u futur në shtresën e mesme, që është fryrë, nga 26% vjet, në 40.3% këtë vit.
Shtresa e varfër është tkurrur nga 73.3% vjet, në 59.3% këtë vit. Të pasurit ndërkohë janë tkurrur nga 0.7% e popullsisë së rritur, në vetëm 0.3% të popullsisë së rritur. Me pasuri, Credit Suisse i referohet si asaj financiare, ashtu edhe asaj jo financiare, që kryesisht në vendin tonë është pasuria e paluajtshme, në pjesën dërrmuese banesat.
Credit Suisse sqaron se, në fakt një shqiptar ka mesatarisht një pasuri financiare prej vetëm 2012 dollarëve për frymë, nga 1819 dollarë për frymë të një viti më parë.
Pra, pasurimi i shqiptarëve, me rreth 1100 dollarë për frymë në harkun e një viti duket se vjen kryesisht si pasojë e fryrjes së pasurisë jo financiare, nga rreth 8800 dollarë për frymë në 9800 dollarë për frymë këtë vit.
Por, Credit Suisse, thotë edhe se, borxhi për frymë është rritur ndjeshëm, nga 6080 dollarë për frymë, në 752 dollarë për frymë sot.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.