1,1 mln euro për 6 ngarkesa problematike në muaj – Koncesioni i skanimit në dogana, buxheti 3.3 mln euro borxh ndaj kompanisë
Buxheti i shteti paguan rreth 1.1 milionë në muaj euro për të evidentuar vetëm 6 ngarkesa me probleme që hyjnë në kufirin shqiptar. Bëhet fjalë për koncesionin e skanimit të kontenierëve dhe automjeteve në dogana, i bërë aktiv në Prill të 2013 dhe që ka një kohëzgjatje prej 15 vitesh. Sipas të dhënave nga Ministria e Financave, buxheti paguan 15.8 miliardë lekë apo 13 milionë euro në vit ndaj kompanisë që ofron këtë shërbim.
Ndërkohë, financat bëjnë me dije se për vitin 2020, nga skanimi në doganat e vendit janë evidentuar në total 71 raste me probleme, çka do të thotë se buxheti shpenzon nga paratë e taksapaguesve shqiptarë rreth 1.1 milionë euro në muaj vetëm për 6 raste me probleme të cilat kanë të bëjnë kryesisht me transportimin e lëndëve dhe substancave të ndaluara me ligj (lëndë narkotike, mbetje radioactive etj.), kontrabanda e produkteve farmaceutike, mallrat kontrabandë, trafikimi i njerëzve, pastrimi i parave etj.
Numri total i skanimeve në të gjitha pikat doganore për vitin 2020 është 244,769 të tilla. Referuar numrit të kontenierëve që skanohen në doganat Kapshticë, Morinë, Qafë Thanë dhe Kakavijë, skanohen të gjithë kontenierët që kalojnë nëpëmjet këtyre pikave kufitare, ndërsa në Doganën e Durrësit skanimi i kontenierëve bëhet mbi bazën e profileve të riskut- natyrës së mallit, origjinës etj. Ndërkohë, pandema COVID-19 ka sjellë si rezultat edhe reduktimin e pagesës të vitit 2020 për shoqërinë koncesionare në masën 400 milion lekë.
Ministria e Financave ka rinegociuar kontratën e konceisonit, ku janë shtyrë pagesat për disa muaj, vlera e të ciave arrin në 3.3 milion euro, për të cilat është rënë dakord të paguhen në mënyrë propocionale në vlerën e 279 mijë euro çdo muaj, mbi këstin e rregullt mujor të Tarifës së Shërbimit të secilës Pikë Operimi.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.