118 milion euro për blerjen e energjisë – Fatura e OSHEE për 2020-ën, 18 milion euro u shpenzuan në 2 javët e fundit të dhjetorit
Rreth 118 milion euro u shpenzuan nga Furnizuesi i Tregut të Lirë gjatë vitit 2020 për blerjen e energjisë, me qëllim plotësimin e nevojave konsumatore. 18 milion euro u shpenzuan vetëm në 2 javët e fundit të muajit dhjetor, teksa ajo që bie në sy është fakti se në disa proceduar të zhvilluara gjatë këtij muaji çmimi me të cilin u ble energjia arriti në 99.54 dhe 106.05 euro/mwh. Sipas të dhënave zyrtare, 60.1 mln euro u shpenzuan për periudhën janar-gusht, ndërkohë që pjesa tjetër është përpunuar nga TV SCAN sipas të dhënave të bëra publike nga OSHEE dhe i takon energjisë së blerë në periudhën nga shtatori deri në muajin dhjetor.
Ky vit është dominuar nga shpenzime të larta për blerjen e energjisë, teksa një zbutje e faturës u vu re në muajin tetor, në raport me muajt paraaradhës, e ndikuar nga reshjet gjatë këtij muaji. Megjithatë, faturat e kripura për pjesën tjetër të vitit reflektojnë uljen e prodhimit të energjisë për shkak të situatës jo të favorshme hidrike, ndërsa nxjerrin edhe një herë në pah nevojën që ka vendi ynë për diversifikimin e burimeve të prodhimit të energjisë.
Aktualisht, është lidhur kontrata për ndërtimin e një parku fotovolatik në zonëne Karavastasë, ndërsa pritet që të zhvillohet ankandi për një central të ngjashëm edhe në zonën e Spitallës. Paralelisht, edhe sektori privat ka shprehur interes për këto investime, teksa një aplikim për ndërtimin e një impianti me kapacitet 50 MW ka mbërritur pranë Ministrisë së Infrastrukturës dhe Energjisë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.