125 milion lekë për 100 fshatra të Shqipërisë – Hapet tenderi për promovimin e zhvillimin e tyre. Detajet
Fondi Shqiptar i Zhvillimit ka njoftuar përmes APP hapjen e tenderit për “Ndërhyrje për promovimin e zonave të 100 Fshatrave nëpërmjet eventeve kulturore, sportive, kulinarie, sociale, etj” dhe “Organizimi i eventeve për promovimin e zonave të 100 Fshatrave”.
Sipas informacionit të publikuar fondi limit për këtë projekt është 125,000,000.00 Lekë ndërsa afati i fundit i aplikimeve është data 24-11-2021, ora 11:00. Në dokumentacionin e tenderit theksohet se kohëzgjatja e kontratës ose afati për zbatimin e saj është 36 muaj.
Fshati shqiptar në pak më shumë se 100 vjet ka kaluar disa periudha tranzicioni të cilat kanë lënë gjurmët e tyre në zhvillimin jo të qëndrueshëm të fshatit. Sot, duket se interesi për këto zona është rritur.
Programi synon ndër të tjera të koordinojë ndërhyrjet zhvillimore në këto zona, sipas një qasjeje ndërsektoriale dhe me shumë aktorë, që shkojnë përtej ndërhyrjeve të copëzuara dhe me qasje strikte sektoriale.
Ky program do të targetojë objektiva të matshëm për zhvillimin e hapësirës rurale, nëpërmjet investimeve publike, atyre të donatorëve dhe investimeve private, në hapësirën e mirëpërcaktuar të 100 Fshatrave, me fokus zhvillimin social-ekonomik e zhvillimin e agroturizmit e turizmit rural, natyrës, mjedisit, dhe trashëgimisë kulturore.
Qëllimi i Programit është ta bëjmë zonën e 100 Fshatrave të dashur për të jetuar, vizituar, punuar, argëtuar, shërbyer për banorët, të ikurit, komshinjtë, miqtë e afërt dhe miqtë e largët.
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.