12,906 të huaj të Shqipëri në 2017 – Gjysma qëndron për arsye punësimi
Shtetasit e huaj me leje qëndrimi në vendin tonë gjatë vitit 2017 arritën në 12,906 banorë. Kjo përbën një rritje të lehtë me 3.1% krahasuar me një vit më parë, ndërkohë që vazhdojnë të mbizotërojnë të huajt me origjinë nga Europa, edhe pse në rënie.
Po ashtu në rritje rezulton edhe numri i të huajve të parregullt të evidentuar gjatë vitit të kaluar, me rreth 1049 persona, të cilët vinin kryesisht nga vende si Siria, Algjeria dhe Libia.
Shtimi i të huajve që qëndrojnë në vendin tonë shfaqi ngadalësimin më të madh që prej vitit 2010. Ndërkohë gjysma e tyre, ose 49.1% qëndrojnë në vendin tonë për arsye punësimi, ndjekur nga aplikimet për bashkim familjar me 23.1%.
Një numër i lartë i huajsh qëndron edhe për arsye humanitare (2381), çka konsiston përgjithësisht në pranimin e 309 azilkërkuesve dhe rreth 2 mijë muxhahedinëve iranianë që strehohen në vendin tonë.
Ndërkohë, numri i të huajve që vijnë në Shqipëri për qëllime studimi pothuajse nuk paraqet asnjë ndryshim nga viti i kaluar, me rreth 656 persona. Megjithatë kjo shifër është ndjeshëm më e lartë se vitet 2013-2015.
Ndarë sipas origjinës, pas Iranit, ndjek Italia me 1779 shtetas të huaj (në rritje me 5%), Kosova me 978 shtetas, Turqia me 863 shtetas dhe Greqia me 295 shtetas. Ndërkohë në rritje shfaqet numri i personave të huaj me origjinë nga SHBA, Kina dhe Mbretëria e Bashkuar.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.