130 milionë dollarë “në letër” për pronarët deri në 2024 – Qeveria miraton parashikimet buxhetore afatmesme për Agjencinë e Trajtimit të Pronave
Megjithëse bëhet fjalë për një fond që nuk shpërndahet kurrë në realitet, Ministria e Financave edhe këtë fundviti ka miratuar shumat që supozohet se duhet të përdoren nga buxheti I shtetit për kompensimin e pronarëve. Duke I qëndruar përcaktimeve ligjore, Ministria ka parashikuar të paguajë nga buxheti rreth 130 milionë dollarë në favor të pronarëve të cilëve u është njohur me vendim përfundimtar e drejta e kompensimit të pronave. Specifikisht Qeveria ka akorduar një fond prej 4.2 miliardë lekësh në vitin 2022, 4.7 miliardë në vitin 2023 dhe po 4.7 miliardë në vitin 2024. Fonde të cilat përsëri me shumë gjasa do të mbeten të pashpërndarë.
Dështimi më I freskët I përdorimit të këtij fondi për qëllimin e parashikuar me ligj është viti 2021. Ndërsa vitet e mëparshme, arrihej të shpërndahej ndonjë pjesë e vogël e këtij fondi, për vitin ku jemi, veprimtaria e Agjencisë së Trajtimit të Pronës është bllokuar thuajse tërësisht. Në raportin për 8 muajt e parë të vitit, të depozituar në Ministrinë e Drejtësisë, Agjencia e Trajtimit të Pronave thekson se shkak është bërë vendimi I Gjykatës Kushtetuese e cila pranoi kërkesën e Shoqatës Pronësi me Drejtësi për rrëzimin e disa neneve të Ligjit të Ri për Kthim Kompensimin. Gjatë kësaj periudhe është vijuan vetëm me trajtimin me kërkesë të veçantë, formulë që u jep mundësi pronarëve të marrin jashtë radhe kompensimin, nëse pranojnë të heqin dorë nga pjesa dërrmuese e shumës totale.
Procesi i ekzekutimeve për vendimeve përfundimtare që kanë njohur të drejtën e kompensimit aktualisht është i bllokuar për shkak se në datën 04.02.2021, Gjykata Kushtetuese mori në shqyrtim kërkesën e Shoqatës “Pronësi me drejtësi”, në lidhje me Kushtetutshmërinë e Ligjit 133/2015, neni 6, pika 1, shkronja “b” dhe neni 7, Pika 2, shkronjat “a” dhe “b” dhe VKM 223/2016, të ndryshuar etj. Me zbardhjen e vendimit të Gjykatës Kushtetuese të botuar në Fletoren Zyrtare është ngritur me Urdhër te Ministrit të Drejtësisë një grup pune për “Hartimin e projektligjit “Për disa shtesa dhe ndryshime në ligjin 133/2015”, për të reflektuar në ato pika të cilat u shfuqizuan nga Gjykata Kushtetuese”.
Aktualisht po punohet me anëtarët e grupit të punës në Ministri si dhe me një grup pune nga Avokatura e Shtetit, për të konkluduar në propozimin përfundimtar i cili do të dërgohet Këshillit të Ministrave dhe Kuvendit të Shqipërisë për miratimin e tij.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.