132.5 mln lekë për supervizimin e Unazës së Madhe – ARRSH hap tenderët për 7 lotet e rinj që do ndërtohen pas finalizimit të garës
Supervizimi i punimeve në lotet e rinj të Unazës së Madhe do të kushtojë rreth 132.5 mln lekë. Autoriteti Rrugor Shqiptar ka hapur 7 tenderë, për secilin prej loteve të cilët janë në fazë tenderuese. Gara e prokurimit publik për ndërtimin e tyre u shpall në datën 16 gusht, ndërsa parashikon ndërtimin e pjesës së mbetur të Unazës së Madhe, duke bërë bashkimin e të gjithë segmenteve, që janë ndërtuar apo janë duke u ndërtuar.
Në total janë 7 lote, për të cilët është hapur gara tenderuese, ndërkohë që fondi limit është 15.6 mld lekë apo 129 mln euro. 3 prej tyre përfshijnë ndërtimin e segmentit nga sheshi Shqiponja te Bulevardi i Ri dhe urat mbi lumë, me një kosto prej 7.42 mld lekë apo 61.3 mln euro dhe me një gjatësi prej rreth 3 km.
Ndërkaq, 4 lotet e tjerë përfshijnë ndërtimin e Unazës së Jashtme të Tiranës, me një kosto totale prej 67.7 mln euro. Ky segment fillon pas lotit 3, në afërsi të Shkozës, që aktualisht është duke u ndërtuar , duke zbritur në faqen veriore të Kodrës së Priftit, në zonën e Kinostudios , zbret drejt lumit të Tiranës e më pas bëhet bashkimi me segmentin Babrru – Bregu i Lumit – Kthesa Kamëz. Për ndërtimin e Unazës së Madhe, aktualisht po punohet në 3 lotet e segmentit Pallati me Shigjeta-Sheshi Shqiponja, si dhe në pjesën lindore të saj.
Sipas deklaratave publike të ministres së Infrastrukturës dhe Energjisë, në fund të muajit shator, rruga kryesore e këtyre segmenteve do të jetë e hapur për kalimin e automjeteve. Ndërkaq, sa i takon segmenteve që janë në fazë tenderimi, kompanitë e interesuara kanë afat deri në datën 15 shtator për të dorëzuar ofertat e tyre, ndërkohë që referuar dokumenteve të tenderit, punimet për realizimin e veprës do të duhet të zgjatin 2 vjet nga moment i nënshkrimit të kontratës.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.