1,424 transaksione të dyshimta në 2019 – 6.6% më pak raportime nga noterët, kadastra, leasing. U sekuestruan 9,7 milionë euro

Për vitin 2019, në adresë të Drejtorisë së Parandalimit të pastrimit të parave janë raportuar 1,424 transaksione të dyshimta. Sipas raportit zyrtar të këtij institucioni për vitin 2019, numri i raportimeve është 6.6% më i ulët nga një vit më parë. Drejtoria e Pastrimit të Parave e justifikon këtë rënie të raportimeve me argumentin se disa subjekte janë ndërgjegjësuar më tepër në drejtim të rritjes së cilësisë të denoncimeve të dërguara.

Disa nga subjektet që kanë pësuar rënie janë: noterët, Kadastra, shoqëritë e institucioneve të qiradhënies financiare, apo shoqëritë e pagesave elektronike.

“Për sa i përket uljes së numrit të raportimeve të RAD-ve nga noterët konstatojmë se kjo mund të ketë ardhur për shkak të uljes së raportimeve nga dy prej tyre pas trajnimeve të kryera nga DPPPP dhe ndërgjegjësimit të tyre për rritjen e cilësisë së raportimit dhe fokusimin në rastet me indicje dhe anomali të mirëfillta në funksion të parandalimit të pastrimit të parave”, thekson raporti.

Ndërkaq, ka shënuar rritje totali i aseteve të bllokuara nën dyshimin se janë prodhuar në rrugë kriminale. Në raport zbulohet se gjatë vitit 2019, janë nxjerrë në total 16 urdhra bllokimi të përkohshëm, kryesisht për llogari bankare, në një vlerë totale prej rreth 9,7 milion EUR, nga të cilat janë sekuestruar me vendim Prokurori /Gjykate rreth 7,8 milion EUR.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.