1/5 e nxënësve u regjistruan ë Arsimin profesional – Në Durrës, interesi më i lartë, Korça zhgënjehet
Arsimi profesional ka qenë një nga prioritetet e qeverisë vitet e fundit në arsim, ku falë edhe sloganit “Shqipëria ka punë, duhen profesionistë”, u është bërë thirrje të rinjve të regjistrohen në shkollat e mesme të specializuara.
Në vitin shkollor 2016-2017, numri i të regjistruarve në arsimin e mesëm profesional është rritur ndjeshëm dhe përbën 19.8% të totalit të të regjistruarve në arsimin e mesëm. Nëse llogarisim vetëm arsimin publik, kjo shifër rritet më tej në 20,9%.
Qarku që ka patur përqindjen më të lartë të të regjistruarve ka qenë Durrësi, ku pothuajse 1/3 e nxënësve kanë zgjedhur arsimin profesional. Ky numër tejkalon shifrën 25% edhe në qarqet Shkodër e Vlorë, ndërsa edhe në kryeqytet afërsisht ¼ e nxënësve të arsimit të mesëm kanë zgjedhur shkollat profesionale kundrejt gjimnazeve të përgjithshme.
Teksa në pjesën më të madhe të vendit ky numër ka pësuar rritje, në disa qarqe interesi ka rënë duke e krahasuar me vitin shkollor 2012-2013.
Në Lezhë, Kukës, Korçë, Dibër dhe Berat numri i të regjistruarve në arsimin profesional publik është ulur.
Ndryshimi më domethënës është në Korçë, pasi ky qark ishte para 5 vitesh, kryesues në rang vendi për numrin e të regjistruarve. Kjo reflektohet edhe në numrin e të diplomuarve në arsimin profesional, i cili në vitin 2016 përbën rreth 25% të numri total të nxënësve që kanë mbaruar arsimin e mesëm.
Ndërkohë, qarqet e Kukësit, Dibrës dhe Lezhës paraqesin edhe numrin më të ulët të të diplomuarve në arsimin profesional, nën 5% të nxënësve që mbaruan arsimin e mesëm publik.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.