15 milion dollarë dëme në prona e mjedis – Zbardhet analiza e KLSH për vitin 2019, Bujar Leskaj: Sfida e radhës sistemet IT
23 inspektime të kryera gjatë vitit 2019 nga Departamenti i Auditimit të Aseteve dhe Mjedisit të Kontrollit të Lartë të Shtetit kanë zbardhur një dëm ekonomik prej afro 15 milionë dollarësh. Konkretisht bëhet fjalë për 8 auditime në ZVRPP, 7 auditime në ALUIZN-et, 5 auditime në ente mjedisore, si dhe 1 auditim tematik në Shërbimin Gjeologjik Shqiptar.
Në mënyrë të përmbledhur, shkeljet e konstatuara në auditimet e zhvilluara nga KLSH, konsistojnë në: Vonesa në Administrimin e praktikave dhe kërkesave në proces; Regjistrimi i lejeve të ndërtimit mbi truall shtetëror; Regjistrime pasurish me ndryshime të zërave kadastral; Regjistrimi në bashkëpronësi të paligjshme të pasurive bujqësore; Regjistrimi i lejeve të legalizimit të parregullta, të lëshuara për objekte në pronësi “shtet”, që kanë sjell si pasojë fshirjen e të drejtës së pronësisë së shtetit. Probleme janë konstatuar edhe me Mos evidentimin dhe mos respektimi i procedurave të regjistrimit të pronave me mbivendosje apo mos bërja e bilancit AMTP-LN, printim III dhe listave të trojeve sipas kryefamiljarëve.
I pranishëm gjatë analizave vjetore, Kryetari në detyrë i Kontrollit të Lartë të Shtetit Bujar Leskaj tha se sfida e institucionit në të ardhmen është auditimi i performancës së sistemeve IT në administratën shtetërore.
Departamenti i Auditimit të Aseteve dhe Mjedisit për vitin 2019 ka rekomanduar 203 masa disiplinore për institucionet e audituara, 8 kallëzime penale dhe indicie për hetime të thelluara për 20 persona.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.