150 vende të reja pune/Nesër nis testimi për policët e rinj, faza e parë – Çfarë duhet të dinë aplikantët

Ditën e hënë nis testimi për “Patrullën e Përgjithshme” në Kolegjin e Policisë. Faza e parë e testimit do të zhvillohet në dy ditë, 15-16 tetor, ku aplikantët do të drejtohen sipas numrave të kodit.

“Nesër dhe pasnesër do të konkurrojnë 2700 aplikantë për 150 vende që policia e shtetit i ka të nevojshme për ti pasur oficerë vitin e ardhshëm. Kjo është faza e parë, pasi janë tre testime që do të bëhen. Testimi i parë është më shkrim dhe do të zhvillohet në Pallatin e kongreseve, ndërsa dy testimet e tjera do të zhvillohen pranë Akademisë së Sigurisë. Të gjithë aplikantët e kanë marrë njoftimin, ditën orën dhe mënyrën se si do zhvillohet testimi. Te gjithë aplikantët që janë me kodet për ditën e nesërme, të paraqiten në orën 7 e 30 të mëngjesit për të konkurruar. Konkurrimi është shumë i rëndësishëm për ta, ata do të testohen për njohuritë që kanë marrë në shkollën e mesme. Dhe më pas do të zhvillohen testimet e tjera, që janë testimi fizik dhe testimi psikologjik. Të gjithë aplikantët duhet të jenë të pajisur me dokument identifikimi dhe nuk duhet të kenë me vete aparat celular. Kur të vendosen në sallë ata do të njihen me të gjitha udhëzimet e tjera.”, deklaroi drejtori i Akademisë së Sigurisë Bilbil Mema.

Nga rreth 2700 aplikantë, 384 rezultojnë femra, ndërsa 622 aplikantë janë me shkollë të lartë, edhe pse si kusht është vetëm shkolla e mesme.

Rezultati del menjëherë në sallë, pas përfundimit të konkurrimit, pasi testimi bëhet në mënyrë elektronike. Sipas pikëve do të renditën të gjithë kandidatët, që do të përzgjidhen fazat e tjera.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.