176 punonjës u aksidentuan në 2019-ën – Ndërtimi mban rekord, rritet ndjeshëm numri i aksidenteve
Rreth 176 punonjës janë aksidentuar në vendin e punës gjatë vitit 2019, prej të cilëve 38 rezultuan me pasoja fatale të humbjes së jetës. Të dhënat zyrtare të Inspektoriatit Shtetëror të Punës për vitin që lam pas, të siguruar nga “SCAN”, tregojnë se numri i punëmarrësve të aksidentuar u përket 168 subjekteve. Sipas këtij institucioni, gjatë 2019-ës, ka pasur një ulje me 18 të numrit të aksidenteve në punë, të cilat janë të lidhura drejtpërsëdrejti me natyrën e zakonshme të punës dhe jo si ngjarje që vlerësohen si aksidente në punë për efekt të trajtimit nga skema e sigurimeve shoqërore dhe shëndetësore.
Po ashtu, ka një ulje me 0.6 % të rasteve të aksidenteve massive. Në këto aksidente të paktën dy apo më shumë punëmarrës dëmtohen në të njëjtën kohë dhe për shkak të së njëjtës arsye dhe që lidhen kryesisht me masa të munguara të mbrojtjes kolektive në punë. Sektori më problematik, në raport me numrin e punëmarrësve të aksidentuar dhe sidomos me pasojë humbjen e jetës, gjatë 2019 ka rezultuar sektori i ndërtimit.
Sipas raportit të Inspektoratit, për vitin 2019, rezultojnë 28 % punëmarrës të aksidentuar në këtë sektor më shumë se një vit më parë, nga të cilët 52 % më shumë se në vitin 2018, kanë rezultuar fatale për jetën. Ndërsa nuk mbetet pas as sektori minerar. Vërehet se subjektet njohin shumë pak dhe nuk zbatojnë detyrimin e tyre për marrje leje nga inspektori i punës para vënies në punë të ndërmarrjes apo të një pjese të saj, si dhe për çdo ndryshim të rëndësishëm në mënyrën e punës, prodhimet e përdorura, makineritë dhe pajisjet siç parashikohet në legjislacion, çka rrit probabilitetin e ndodhjes se aksidenteve në punë. Raporti, citon se nga të dhënat e aksidenteve të vitit 2019, asnjë nga subjektet të cilat janë përfshirë në një ngjarje aksidenti në punë nuk kishin leje pune nga inspektori i punës, sipas detyrimit ligjor të cituar më sipër, duke shmangur inspektimin dhe monitorimi në vazhdimësi nga inspektorët e punës.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.