18.3 mld lekë për Tiranën – Pr.Buxheti 2019, si do të shpërndahen paratë
Tirana do të ketë një buxhet prej rreth 13.4 miliardë lekësh për vitin 2019 me një rritje prej 2.9 për qind krahasuar me vitin aktual, ndërsa duke i bashkëngjitur transfertën e pakushtëzuar dhe të ardhurat e mbartura, shkon në nivelin më të lartë që ka pasur ndonjëherë në 18.3 miliardë lekë.
Por si do të shpërndahen paratë dhe kush përfiton më shumë? Referuar tabelave të projektbuxhetit 2019-2021 të Bashkisë së Tiranës, pjesa më e madhe e fondeve të llogaritura si shpenzime korrente dhe kapitale, rreth 5.2 miliardë lekë shkon për shërbimet publike vendore, i cili lidhet me projektet për përmirësimin e infrastrukturës vendore përmes rikualifikimit të hapësirave publike, shërbimeve publike të pastrimit, gjelbërimit, ndriçimit etj.
Po ashtu, një fond i konsiderueshëm prej 3.9 miliardë lekësh shkon për arsimin parauniversitar dhe edukimin, i cili do të fokusohet në ndërtimin dhe rikonstruksionin e ambienteve të reja shkollore dhe parashkollore.
3.7 miliardë lekë shkojnë për menaxhimin e rrugëve dhe transportit rrugor si dhe rreth 2.8 miliardë lekë për planifikimin, menaxhimin dhe administrimin i cili fokusohet në strehimin e shtresave në nevojë.
Ndërsa për zërat e tjerë, fondet janë më të ulëta. Sa i takon projekteve strategjike, edhe gjatë vitit 2019 do të vijohet me ndërtimin e 17 shkollave të reja, me pyllin orbital, ndërtimin e rrjetit minimal të biçikletave, terminalet e transporteve, bulevardin verior të Tiranës, rehabilitimin e Lumit të Tiranës, kopshtin zoologjik dhe Piramidën.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.