2.7 milionë euro dëm nga tenderët – Institucionet shkelën me “të dyja këmbët” prokurimin dhe zbatimin e kontratave
Moszbatimi i procedurave në dhënien tenderave publikë dhe zbatimin e kontratave, vijon të mbetet një shqetësim i vazhdueshëm dhe plagë për buxhetin e shtetit. Sipas raportit të publikuar së fundmi nga Kontrolli i Lartë i Shtetit, për gjysmën e parë të vitit, dëmi ekonomik i rezultuar në fushën e prokurimit të nevojave për mallra/shërbime/investime publike, kap vlerën e 336 milionë lekëve apo afro 2.7 milionë euro.
KLSH bën me dije se dëmi është konstatuar si në fazën e zhvillimit të procedurave të prokurimit, ashtu edhe në fazën e zbatimit të kontratave dhe dorëzimit të punimeve. Problematikat e konstatuara nga auditimet lidhen jo vetëm me planifikim jo të drejtë të nevojave por edhe një proces të realizuar jo në përputhje me kërkesat ligjore në fuqi. Mangësitë i referohen implementimit jo të saktë të kërkesave dhe detyrimeve ligjore nga entet publike që prokurojnë fondet përmes sistemit të prokurimit publik, fakt që sipas KLSH lidhet edhe me kapacitetet njerëzore jo gjithmonë profesionale, që përfshihen në realizimin e këtij procesi.
Kështu, nga dëmi total, 270.6 milionë lekë janë shkaktuar në fazën e realizimit të procedurave të prokurimit, nga 9 subjekte, shkelje të cilat rezultuar në plotësimin e kritereve të kualifikimit, në skualifikimet e ofertuesve, në hapjen e shqyrtimin e ofertave, në ofertat anomalisht të ulta dhe zhvillohen procedura prokurimi me një pjesëmarrës dhe fitues njëkohësisht. Ndërsa vlera tjetër prej 65.3 milionë lekësh është konstatuar në zbatimin e punimeve nga 8 subjekte.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.