20 litra ujë falas – Këshilltarja e Gjiknurit: Do përfitohet nga familjet në nevojë
Familjet në nevojë do të furnizohen me 20 litra ujë për frymë në ditë, pa pagesë. Gjithçka përcaktohet në kontratën e performancës që bashkitë do të duhet të lidhin me Agjencinë Kombëtare të Ujësjellës Kanalizime, në kuadër të reformës në sektorin e ujit. Sipas tekstit të kontratës, ky është një prej indikatorëve të performancës së aksionit gjatë vitit 2018, mbi bazën e të cilave do të vlerësohen shoqëritë UK për marrjen e subvencioneve nga shteti.
Vendimi u paralajmërua më herët edhe nga këshilltarja e ministrit të Infrastrukturës dhe Energjisë, Lindita Sotiri, e cila ishte ftuar në studion e TV SCAN për të folur mbi reformën e ujit.
“Kuptohet që uji nuk është vetëm mall konsumi, është një e drejtë dhe një detyrim i qeverisjes për t’ia ofruar këtë të drejtë qytetarëve. Ne jemi munduar të marrim të gjitha masat që shtresat në nevojë që është kategoria më vulnerabël të mos preken nga ky aksion dhe nga kjo reformë. Për të gjithë ne të tjerët që nuk jemi pjesë e këtyre kategorive, do të duhet që të reflektojmë dhe të kemi atë qasje që kemi për çdo mall që konsumohet. Pra, çfarë konsumojmë do të duhet ta paguajmë.
Politika që kemi bërë ne në mënyrë që edhe nëse do të ndodhë kjo rritje çmimesh mos të impaktojë shtresat në nevojë, pra qytetarët është që mbulojmë 20 litër për frymë në ditë, që është minimum jetik, i nevojshëm për shtresat në nevojë. Pra, kjo fashë do të përballohet nga qeverisja qendrore dhe pastaj, sigurisht që Enti Rregullator i Ujit është përgjegjësi kryesor për të mbrojtur konsumatorin, për të bërë një analizë që vjen nga bashkia përkatëse për të rritur apo jo çmimin.”
Në kuadër të lehtësimit të familjeve në nevojë, pak javë më parë qeveria miratoi edhe vendimin që parashikon subvencionimin e tarifës së lidhjes së kontratës dhe të vendosjes së matësve të ujit për kategoritë në nevojë.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.