“20 mln e 200 mijë pemë”, Klosi: Bashkëpunim me biznesin dhe pushtetin lokal
Ministria e Mjedisit dhe Turizmit synon që brenda vitit 2020 të realizojë projektin për të mbjellë 20 milionë e 200 mijë pemë. Sipas Klosit një pjesë e tyre do të vijë edhe nga shlyerja e detyrimit ligjor për pyllëzimin që bizneset kanë për dëmin e shkaktuar në mjedis nga ushtrimi i aktivitetit të tyre. Gjithashtu pyllëzimi do të vijë edhe nga bashkëpunimi me pushtetin lokal.
“6 milionë fidanë mungojnë në fondin pyjor si pasojë e mosshlyerjes së këtij detyrimi nga kompanitë. Për çdo pemë të prerë biznesi ka detyrimin që të mbjellë 3 pemë, dhe për çdo pyll të shpyllëzuar duhet të mbjellë sipërfaqe të pyllëzuara 3 herë më të mëdha së sipërfaqja që dëmtohet”.
Ministria e Turizmit dhe Mjedisit do të zhvillojë kontrolle rigoroze për zbatimin e detyrimit ligjor që biznesi ka për zhdëmtimin e dëmit mjedisor si dhe do të rishikojë planet e menaxhimit të pyjeve.
“Bashkitë nga ana e tyre duhet të rishikojnë planet e menaxhimit të pyjeve dhe të rakordojnë me biznesin për sipërfaqe të gjelbërta në zona pranë komunitetit në mënyrë që gjelbërimi t’i shërbejë njerëzve dhe njerëzit t’i shërbejnë mjedisit”.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.