2019-ta, rekord i punonjësve informalë / Kapen në të zezë rreth 2900 punonjës, dëm 2 milionë euro në sigurime
Të paktën në 4 vitet e fundit, 2019-ta mban rekord sa i takon numrit të punonjësve informalë të evidentuar në biznese.
Sipas raportit të Inspektoriati Shtetëror të Punës për vitin 2019, të siguruar nga “SCAN“, vihet re se janë evidentuar të punojnë në informalitet të plotë gjithsej 2879 punonjës, afro 1300 më shumë se viti 2018, apo më shumë se 2300 krahasimisht me vitin 2017.
Me një përllogaritje të thjeshtë, kostoja e munguar në arkën e shtetit për sigurime shoqëror e shëndetësore për një muaj, për këta punëmarrës, është në vlerën e 20.8 milion lekëve në muaj, afro 250 milionë lekë në një vit apo rreth 2 milionë euro.
Sipas raportit të Inspektoriatit Shtetëror të Punës, numri më i madh i punëmarrësve informalë të evidentuar, ka qenë gjatë periudhës së sezonit turistik, ku u zbatua plani operacional antiinformalitet, ndërkohë që 299 punëmarrës informalë më shumë se një vit më parë janë formalizuar gjatë kontrolleve të ushtruara nga inspektorët e punës.
Gjatë periudhës janar-dhjetor 2019, Inspektoriati Shtetëror i Punës dhe Shërbimeve Shoqërore ka realizuar gjithsej 13079 inspektime në subjekte Private dhe Shtetërore ose 782 inspektime më shumë se një vit më parë.
Elisabeta Dosku/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.