2020, Pandemia godet Sigurimet shoqërore – Bie për herë të parë nga 2019 volumi i arkëtimeve, numri i kontribuesve rënie 4.4%
Pakësim i numrit të kontribuesve ashtu si dhe rënie e fortë e të ardhurave nga sigurimet shoqërore. Është ky efekti i Pandemisë Covid 19 në skemën e sigurimeve shoqërore për vitin 2020, i cili shënon edhe rënien e parë të volumit të kontributeve të sigurimeve shoqërore që prej vitit 2015. Të dhënat vijnë përmes raportit të sapo publikuar nga Instituti i Sigurimeve Shoqërore mbi ecurinë e të ardhurave dhe shpenzimeve për këtë skemë për vitin e shkuar.
Nga 100.6 miliardë lekë, apo rreth 1 miliardë dollarë, në vitin 2019, totali i të Ardhurave për Sigurimet Shoqërore ka rënë në 98.9 miliardë lekë, ose në rreth 980 milionë dollar në vitin e shkuar. Në rënie të dukshme është edhe numri i bizneseve dhe personave që kanë kontribuar në skemë për vitin 2020, gjë që reflekton edhe vështirësitë e shumta që hasën bizneset, shumë prej të cilave arritën edhe në mbyllje të aktiviteteve apo shkurtime të stafit për shkak të pandemisë.
Në fund të vitit 2019 numri total i subjekteve kontribues në skemën e sigurimeve ka qenë 747,875, për të shënuar një rënie prej 4.4% në vitin e Pandemisë, kur në total rezultojnë 747,875. Rënia e kontribuesve është kompensuar nga buxheti, i cili ka nxjerrë më shumë para gjatë vitit 2020 për të mbuluar boshllëkun e krijuar. Nga rreth 254 milionë dollarë që u përdorën nga buxheti në vitin 2019 për të subvencionuar skemën e sigurimeve shoqërore, shifra ka kërcyer në rreth 290 milionë dollarë për vitin 2020.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.