2020, përkeqësohet situata e vakancave – KLGJ: 69 gjyqtarë të shkarkuar me vendim të formës së prerë ose të dorëhequr
Për vitin 2020 gjykatat kanë vuajtur jo vetëm mungesën e gjyqtarëve të shkarkuar nga Vetting-u, por edhe të ndihmësve ligjorë si dhe stafit administrativ, gjë që është përkthyer në rënie të eficcencës së tyre. Scan Televizion ka zbardhur raportin vjetor të Këshillit të Lartë Gjyqësor mbi vakancat në sistem për vitin 2020.
Numri faktik i punonjësve në gjykatat e të gjitha niveleve, në fund të vitit 2020, është 1,284 punonjës, kundrejt 1,548 punonjës sipas strukturës organizative, pra 254 punonjës më pak. Këshilli i Lartë Gjyqësor specifikon se 69 prej tyre janë magjistratë, mungesa të cilat janë për shkak se janë të shkarkuar nga Kolegji i Posaçëm i Apelimit me vendim të formës së prerë, janë të dorëhequr, ose janë vende vakante të paplotësuara më parë, ndërsa 115 administratë gjyqësore. Këto mungesa ka qënë e pamundur të plotësoheshin të gjitha brenda vitit 2020, raporton KLGJ.
KLGJ ka raportuar më herët se numri i vakancave në total arrin mbi 100 për gjithë sistemin, gjë që ka shkaktuar vonesa të forta në shqyrtimin e çështjeve, ashtu si edhe pamundësi për nisjen e shqyrtimit për një përqindje të lartë të totalit.
Vakancat e konsiderueshme kanë sjellë edhe tkurrje të buxhetit të sistemit gjyqësor përgjatë gjithë vitit 2020.
Gjatë vitit buxhetor 2020, buxheti i sistemit gjyqësor për shkak të situatës është rishikuar 4 herë, duke u shkurtuar në vlerën totale prej 515 milionë lekë, (nga të cilat në shpenzime paga në vlerën 441 milionë lekë, shpenzime sigurime shoqërore 40 milionë lekë dhe shpenzime operative në vlerën 33,500 lekë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.