2020, shkurtohen fondet për pronarët – Buxheti ulet në 22%, ose 11 milionë dollarë më pak për procesin e kompensimit

Kategoria e pronarëve është një prej më të pa favorizuarave për vitin e ardhshëm. Qeveria ka shkurtuar me rreth 22% fondin për kompensimin e tyre për vitin 2020.

Sipas draft buxhetit për vitin e ardhshëm që tashmë ka nisur të diskutohet në Kuvend, rezulton se fondi për këtë zë është 3.7 miliardë lekë, nga 4.8 miliardë lekë në vitin 2019, me një tkurrje prej afro 1.1 miliardë lekësh.

Tkurrja e fondeve vjen në një frymë kur qeveria shlyen shumë pak vendime për kompensimin e pronarëve, duke u dhënë prioritetet vetëm kompensimit të tokave të zëna nga ndërtimet pa leje.

Sipas shifrave zyrtarë të Avokatit të Popullit,  peng i procesit të kthim-kompensimit të pronave janë 26 mijë subjekte.

Ky institucion konkludon se mosekzekutimi deri më sot i 26 mijë vendimeve me të drejtë kompensimi, të dhëna ndër vite prej Agjencisë së Kthimit dhe Kompensimit të Pronave ish Pronarëve (AKKP), sot Agjencia e Trajtimit të Pronave (ATP), ka bërë që ky proces të mbetet ende në kuadrin deklarativ.

Vetë Qeveria pranon se numri i pronarëve të kompensuar është i ulët. Me ritmet aktuale kanë përfituar kompensim vetëm rreth 800 pronarë në vit, numër shumë i ulët duke parë listën e gjatë të pritjes.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.