2021, rriten 42% sigurimet nga zjarri – AMF: Rreth 10 milionë dollarë në 6 muajt e parë të vitit, kontratat u shtuan me 11%
Ndërsa fenomeni i zjarreve dhe shkatërrimeve që ata sjellin me vete, po bëhet më I mprehtë vit pas viti, duket se qytetarët e bizneset po tregohen më të vëmendshëm duke siguruar pronat. Sipas treguesve zyrtarë të tregut të sigurimeve, në portofolin sigurimi nga Zjarri dhe Forcat e Natyrës, gjatë periudhës janar-qershor 2021, vihet re një rritje prej 42.65% e vëllimit të primeve të shkruara bruto të këtij portofoli dhe një rritje me 11.25% e numrit të kontratave të sigurimit, krahasuar me periudhën janar-qershor 2020.
Sipas të dhënave të Autoritetit të Mbikëqyrjes Financiare, nga rreth 7 milionë dollarë në vitin 2020, për 6 muajtë e parë të vitit primet e këtij portofoli rezultojnë në rreth 10 milionë dollarë, afërisht 3 milionë dollarë më shumë.
Trend krejt të kundërt ka pasur volumi I dëmeve të paguara nga kompanitë, të cilat kanë shënuar rënie shumë të fortë krahasuar me një vit më parë, kryesisht për shkak të shumave shumë të larta që u paguan gjatë vitit 2020 për shkak të tërmetit të 26 nëntorit 2019. Për gjashtë muajt e parë të vitit 2020, kompanitë kishin paguar rreth 20 milionë dollarë dëme, shifër që ka rënë me 75% për këtë vit, në vlerën prej rreth 5 milionë dollarësh.
Në total, të ardhurat nga primet e shkruara bruto të sigurimit për periudhën janar-qershor 2021 kapën vlerën 8,8 miliardë lekë, afërsisht 88 milionë dollarë, ose 17.53% më shumë se në periudhën janar-qershor 2020. Gjatë periudhës janar-qershor 2021, numri i kontratave të sigurimit të lidhura arriti në 467,511 me një rritje prej 7.48% krahasuar me periudhën janar-qershor 2020.
Tregu vazhdoi të mbetet sërish i orientuar tek sigurimet e Jo-Jetës, të cilat sollën 92.34% të vëllimit të përgjithshëm të primeve, duke i lënë përkatësisht sigurimet e Jetës me 7.65%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 42.68% dhe primet e shkruara bruto të sigurimit të detyrueshëm zënë 57.32% të totalit të tregut.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.