2021, rritet buxheti 11% për mbrojtjen – Xhaçka: Shtohet me 27 milionë dollarë, shkon në 1.5% e PBB me qëllim kufirin 2% të NATO
Ministrja e Mbrojtjes Olta Xhaçka ka paraqitur të mërkurën në Komisionin parlamentar të Sigurisë Kombëtare Projektbuxhetin e këtij dikasteri për vitin 2021. Ajo tha se për vitin e ardhshëm shpenzimet e Shqipërisë për Mbrojtjen shkojnë në 1.5% të PBB-së, me një rritje prej rreth 27 milionë dollarësh krahasuar me vitin actual, ndërkohë që synimi është plotësimi i kushtit që të arrijë në nivelin 2% të Produktit të Brendshëm Bruto si vend anëtar i NATO-s.
Xhaçka sqaroi se prioritet për vitin e ardhshëm do të jenë rritja e kapaciteteve si dhe stërvitjet dypalëshe me Shtetet Bashkuara të Amerikës, siç është Defender 2021, e cila parashikon dislokimin e 8 mijë trupave amerikanë në disa rajone të vendit.
Xhaçka përmendi edhe vendimin për kompensimin e ushqimit për 4 mijë efektivë të FA gjatë këtij viti.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.