23 milionë euro më shumë nga të punësuarit – Pensionet drejt “shëndoshjes”, si janë rritur kontributet ndër vite!
Politikat e ndjekura nga qeveria po reflektohen në shëndoshje të skemës së pensioneve, e cila është defiçitare për shkak të numrit të ulët të kontribuuesve dhe numrit të lartë të përfituesve. Kështu, sipas të dhënave të Ministrisë së Financave, vetëm në 3 muajt e parë të vitit, të punësuarit në sektorin privat dhe në administratën shtetërore kanë derdhur rreth 28.8 miliardë lekë kontribute të sigurimeve shoqërore dhe shëndetësore, ku masa për çdo të punësuar përcaktohet nga niveli i pagës.
Krahasuar me të njëjtën periudhë të një viti më parë janë paguar rreth 23 milionë euro më shumë, e ndërsa në krahasim me periudhën e para krizës së pandemisë, pra 3 mujorin 2019, rritja është me 43 milionë euro më shumë kontribute të derdhura në arkën e shtetit. Ajo që vihet re ndër vite është rritja progresive, pavarësisht pandemisë. Ndikim në të ardhura ka dhënë rritja rritja e pagës minimale në 30 mije lekë në Janar të 2020-ës çka ka shtuar detyrimin në pagesën e sigurimeve shoqërore.
Po ashtu edhe formula e re e tatimit mbi të dypunësuarit e cila hyri në fuqi më 1 Prill 2021, e cila rriti detyrimin për ata individë që trajtoheshin me dy ose më shumë paga, ka sjellë të ardhurave më të larta. Një faktor tjetër lidhet me rigjallërimin e tregut të punës dhe uljen e shkallës së papunësisë. Ndërkohë që me rritjen e pagës minimale sërish nga 1 Prilli 2022, pritet një situatë edhe më pozitive në këtë drejtim, pavarësisht se punonjësit do detyrohen të paguajnë sërish më shumë kontribute.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.