243 kërkesa për sigurinë ushqimore! Gjobat ndërgjegjësojnë subjektet, kërkojnë “konfirmim” nga AKU
243 kërkesa për informacion janë depozituar pranë Autoritetit Kombëtar të Ushqimit gjatë vitit 2018, të udhëhequra kryesisht nga subjektet që operojnë apo duan të jenw pjesw e tregut ushqimor, një shifër kjo 3 herë më e lartë se ajo e vitit 2017.
Referuar të dhënave zyrtare të AKU-së, kërkesat kanë natyra të ndryshme, por shumica e tyre lidhen me një vetëndërgjegjësim të subjekteve për të zbatuar kushtet e sigurisë ushqimore dhe për të qenë konfrom ligjit.
Kështu, kryesisht kërkesat kanë të bëjnë me informacion lidhur me procedurat e importit të produkteve të ndryshme ushqimore; Informacion në lidhje me procedurat për hapjen e një dyqani mish; Informacion më të detajuar në lidhje me notifikimin e etiketës: (elementët që duhet të përmbajë etiketa, sa lloje etiketash duhet të paraqesë, të ndryshme për çdo lloj produkti që do prodhojë etj; Informacion në lidhje me shërbimin e analizimit të mykotoksinave / toksinave në produktet e drithërave; Informacion në lidhje me procedurat për hapjen e një restoranti të ri ; kërkesë për informacion në lidhje me nivelin e pesticideve te perimet që tregtohen; Informacion në lidhje me lejen higjienosanitare që i kërkohet subjekteve nga AKU, e deri tek procedurat për eksport për produkte të veçanta ushqimore.
Ndërsa disa kërkesa të tjera kanë të bëjnë me pakënaqësinë e vendosjes së gjobave nga AKU dhe mënyrën për t’i ankimuar ato.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.