25 prilli, Celibashi takim me gazetarët: “Nuk do votojnë dot të infektuarit që trajtohen në shtëpi. Do shtyhet vlefshmëria e pasaportave”

Në një takim me gazetarët, Kreu i Komisionit Qendror të Zgjedhjeve Ilirjan Celibashi ka adresuar një seri prej sfidave që e presin këtë organ deri në 25 prill.

Lidhur me votimin e emigrantëve, Celibashi tha se koha është e kufizuar por se gjithsesi mund të gjendet një formulë që procesi të kryhet përmes postës apo emailit, ndërkohë që bëri me dije se do të bëjë kërkesë për zgjatjen e vlefshmërisë së kartave të identitetit dhe pasaportave.

Ndërkohë që duket se nuk do të ketë asnjë shans për të votuar për personat e infektuar me Covid 19 që trajtohen në shtëpi, pasi qendra votimi për këtë kategori do të ketë vetëm nëpër burgje e spitale.

Më herët gjatë së enjtes, Kuvendi ka miratuar fondin prej 24 milionë dollarësh për identifikimin biometrik të zgjedhësve, ndërkohë që pajisja që do ta bëjë këtë do të instalohen në njësinë numër 8 në Tiranë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.