25 vjet nga vendosja e marrëdhënieve diplomatike – Kazakistan-Shqipëri përcaktojnë fushat premtuese të bashkëpunimit dypalësh
Thellimi mbi bashkëpunimin dypalësh, sfidat e sigurisë si dhe lufta kundër terrorizmit dhe krimit të organizuar ishin edhe fokusi i diskutimit mes ministrit për Europën dhe Punët e Jashtme, Ditmir Bushati dhe homologut kazak, Kairat Abdrakhmanov.
Në këtë kuadër palët kanë firmosur edhe Protokollin e Bashkëpunimit, që sipas Bushatit përmirëson kuadrin ligjor si dhe forcon marrëdhëniet midis dy vendeve. Ky vit përkon edhe me 25-vjetorin e vendosjes së marrëdhënieve midis diplomatike midis dy vendeve.
“Kënaqësi të jem në #Astana në 25-vjetorin e vendosjes së marrëdhënieve diplomatike mes Shqipërisë dhe Kazakistanit. Me homologun kazak, Kairat Abdrakhmanov diskutuam mbi thellimin e bashkëpunimit dypalësh, sfidat e sigurisë, luftën kundër terrorizmit dhe krimit të organizuar. Në këtë drejtim firmosëm Protokollin e Bashkëpunimit i cili përmirëson kuadrin ligjor dhe forcon marrëdhëniet mes dy vendeve tona”, shkruan ministri Bushati në profilin e tij në Facebook.
Më tej, ministrat vunë theksin te sektorët e ndërtimit, bujqësisë, energjisë si dhe turizmit, duke i cilësuar si fushat më premtuese të bashkëpunimit dypalësh.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.