26 mijë të punësuar në 9 muaj – Vetëm 1/3 e të papunëve integrohen në treg
“Për periudhën janar-shtator 2018 në zyrat e punësimit në të gjithë vendin janë regjistruat 71 mijë punëkërkues të papunë. Ndërkaq po gjatë kësaj periudhe janë punësuar 26 mijë e 345 individë. Por çfarë ndodh me pjesën tjetër?”
Mbi 44 mijë punëkërkues të papunë mbeten në listë pritje në kërkim të një vendi pune.
Nga shifrat zyrtare të Shërbimit Kombëtar të Punësimit, vihet re se problem kryesor për integrimin në tregun e punës qëndron arsimimi dhe mungesa e një profesioni. Rreth 60 për qind e punëkërkuesve të papune të regjistruar janë me arsim deri në 9 vjeçar.
Ndërsa një ngërç tjetër lidhet edhe me moshën. Referuar të dhënave, të rinjtë deri në 29 vjeç përbëjnë, rreth 20 për qind, ndërsa grup- mosha mbi 50 vjeç, përbën rreth 40 për qind të numrit të përgjithshëm.
Shërbimi Kombëtar i Punësimit bën me dije se gjate periudhës Janar-Shtator 2018, janë deklaruar në Zyrat e Punës rreth 50 mijë vende të lira. Ndërsa sa i takon individëve të punësuar, rreth 45 për qind janë të moshës deri në 29 vjeç.
Rreth një muaj më parë, Ministri i Financave dhe Ekonomisë, Arben Ahmetaj, ka bërë me dije se të gjithë punëkërkuesit e papunë të regjistruar do t’i nënshtrohen me detyrim rikualifikimit në kurse profesionale. Dhe periudhës së ndjekjes së kurseve kjo kategori do të paguhet.
Por ndërsa të papunët po orientohen drejt kurseve profesionale, përmes të dhënave zyrtare, vetë Shërbimi Kombëtar i Punësimit, bën me dije se nëse pjesëmarrja në kurset e formimit është e kënaqshme, punësimi pas certifikimit, vazhdon të mbetet një problem serioz pasi, vetëm 4.9 % e punëkërkuesve të papunë të trajnuar gjatë 2017-ës në kurset e profesioneve, kanë arritur të punësohen, apo e shprehur në raport, 1 në 20.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.