261 orë për taksat! – “Kokëçarje” edhe për të paguar, larg mesatares së BE dhe rajonit
Kur bëhet fjalë për taksat, çdo gjë është komplekse, madje edhe të paguash, një proces ky që duhet të jetë më i thjeshti ndër të gjithë të tjerët. Në Shqipëri duhen jo pak, por plot 261 orë, vetëm për t`i paguar detyrimet shtetit, tregon raporti i fundit “Paying Taxes 2018”.
Shifra është e njëjtë me atë të raportit të kaluar, çka do të thotë se në këtë drejtim është bërë progres zero në krahasim me veten dhe regres në krahasim me fqinjët. Shifra përkthehet në rreth 11 ditë në vit dhe tregon se kosto e burokracive është relativisht e lartë, pasi këto orë apo ditë mund të ishin investuar shumë mirë në procesin prodhues të një biznesi.
Edhe në terma krahasuese, situata duket shumë më e komplikuar në vendin tonë. Pra, ndërkohë që në Shqipëri duhen 261 orë për të paguar taksat, në Bashkimin Europian mesatarja fiksohet në 173 orë dhe në Shtetet e Bashkuara të Amerikës në 197 orë.
Sa i përket krahasimit me rajonit, Mali i Zi dhe Bosnje Hercegovina janë më keq se ne në këtë drejtim. Mesatarja e rajonit fiksohet në 230 orë. Madje, në Bosnje Hercegovinë, duhen më shumë se 400 orë.
Siç e tregon qartë edhe grafiku, ndër 261 orët, pjesën dërrmuese e zë taksa korporative, me plot 105 orë, më pas ndjekin ato mbi konsumin me 90 orë dhe ato mbi punën me 66 orë.
Raporti “Paying Taxes 2018” tregoi një rritje të barrës së taksave në vendin tonë në krahasim me një vit më parë, në 37.3%, nga 36.5% të një viti më parë. Raporti prestigjioz publikohet çdo vit nga Banka Botërore në bashkëpunim me “PricewaterhouseCoopers”.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.