275 mijë dollarë për një trombë – Shitet në ankand vegla muzikore e Miles Davis, 3 herë mbi pritshmëritë
Një trombë e rrallë, ngjyrë blu e thellë e që dikur e luante mjeshtri i madh i jazzit, Miles Davis është shitur në një ankand në New York për shifrën e 275 mijë dollarëve.
Davis, i cili ndërroi jetë në viti 1991 konsiderohet nga shumëkush si një prej më të mëdhenjve të jazzit. Albumi i tij i vitit 1959 me titull “ Një lloj hëne” mbetet ende sot albumi më i shitur jazz në botë. Tromba është një Martin Committee me numër modeli T3460, e nxjerrë në qarkullim në vitin 1980. Hëna dhe yjet, pjesë e dizajnit të veglës muzikore janë të krijuara nga vetë Davis.
Ankandi u zhvillua si fizikisht ashtu edhe me oferta nga telefoni. Pronari i klubit të jazzit në Ann Arbor në Michigan rezultoi në fund fituesi i ankandit të veçantë, për shifrën e 220 mijë dollarëve. Kësaj shume i duhet shtuar edhe komisioni i shtëpisë së ankandeve, duke bërë që kosto totale për blerësin e ri të jetë 275 mijë dollarë, bindshëm përtej vlerësimeve paraprake, që flisnin për 70 mijë deri në 100 mijë dollarë.
Blerësi i ri do ta mbajë të ekspozuar veglën e veçantë muzikore, ndërkohë që shprehet se muzikantët e ndryshëm do të kenë shansin edhe të luajnë disa nota në të, në klubin e tij.
Ankandi në fjalë vjen në kuadër të eventit që ndodh një herë në vit të shitjeve të jashtëzakonshme të shtëpisë së ankandeve “Christie`s”. Në këtë event, një herë në vit del në shitje një kryevepër e rrallë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.