28-29 nëntori / Hapet kantieri për ndërtimin e aeroportit të Vlorës si dhe hapet për qarkullim Rruga e Arbrit
Nëpërmjet një njoftimi të publikuar në faqen zyrtare, kryeministri Edi Rama ka njoftuar se më 28-29 nëntor do të hapen konkretisht kantieri për ndërtimin e aeroportit Ndërkombëtar të Vlorës dhe hapja për qarkullim e Rrugës së Arbrit.
Rruga e Arbrit është një nga investimet më të rëndësishme për modernizimin e infrastrukturës rrugore të vendit. Ajo do të shkurtojë në mënyrë të ndjeshme lidhjen e Dibrës me Tiranën, duke ndikuar ndjeshëm në zhvillimin e zonave në të cilën kalon.
Rruga e Arbrit ka 7 tunele me gjatësi totale 8.5 km. Me një gjatësi rreth 74 km, ajo do të bëhet një korridor lidhës i rëndësishëm Lindje-Perëndim.
Ky investim i strategjik, jo vetëm do të afrojë qytetarët e Tiranës e gjithë Shqipërisë me Dibrën dhe Maqedoninë e Veriut, por do jetë një arterie e zhvillimit ekonomik dhe turizmit.
Ndërkohë për ndërtimin e aeroportit të Vlorës është shpallur fitues bashkimi i kompanive të regjistruara në Zvicër, Mabco Construction, i përbërë nga Mabetex Group, i cili mban 50 % të aksioneve, ndërkohë ideatori është YDA Group me 48 % dhe A Group sh.p.k me 2 %. Vlera e investimit është 103.966.030 euro.
Në fazën e parë në periudhën 2-vjeçare do ndërtohet godina e aeroportit dhe pista, që kapin vlerën mbi 103 milionë e 500 mijë dollarë.
Ndërsa në fazën e dytë, në 4 vitet e para do të zhvillohet infrastruktura suplementare e biznesit dhe turizmit që arrijnë vlerën e investimeve me qindra-miliona euro.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.