280 klinika në “sitë” – Cilësia e shërbimit, Manastirliu: Nëse nuk akreditohen rishikohet licenca

Mbi 280 qendra shëndetësore kanë nisur procesin e akreditimit, një proces që duhet të përmbushet nga çdo institucion shëndetësor, për të garantuar sigurinë dhe cilësinë e shërbimit shëndetësor që meritojnë qytetarët”. Deklarata u bë nga Ministrja Manastirliu, gjatë inspektimit të punimeve për ndërtimin e qendrës së re shëndetësore në Sauk, në periferi të Tiranës.

“Me ligjin e ri të kujdesit shëndetësor që pritet të miratohet së shpejti, akreditimi do të lidhet drejtpërdrejt me licensimin dhe ky proces do të përfshijë jo vetëm spitalet, por edhe qendrat shëndetësore, të cilat duhet të plotësojnë standarded bazë”.

Sipas projektligjit, i cili po diksutohet në Kuvend, të gjithë institucionet e kujdesit shëndetësor, pas licencimit të veprimtarisë do të duhet t’i nënshtrohen procesit të vlerësimit të përmbushjes së standardeve bazë të cilësisë për akreditim”. Kjo kërkesë shtohet në nenin e ligjit që saktëson cilësinë e shërbimit, ndërkohë që sipas propozimit të ri, “ procesi i akreditimit do të nisë vetëm në rastin kur institucionet shëndetësore të plotësojnë standardet bazë të cilësisë për akreditim”.

Ndërkohë që, në rast të mospërmbushjes së këtyre standardeve bazë të cilësisë, këtyre institucioneve do t’iu pezullohet licenca. Gjithashtu, ligji i ri përcakton se, nëse edhe pas përfundimit të periudhës së pezullimit institucioni i kujdesit shëndetësor nuk ka përmbushur standardet bazë të cilësisë për akreditim, ministri përgjegjës për shëndetësinë vendos revokimin e licencës për ushtrimin e veprimtarisë.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.