3.5 milionë euro kundër COVID-19 – Preket fondi rezervë. Pajisje për karantinat dhe ushqime
Qeveria është detyruar të marrë masa të ashpra për të parandaluar përhapjen e Coronavirusit në vendin tonë dhe për këtë ka prekur edhe fondin rezervë të buxhetit të shtetit për vitin 2020.
Fondi në total është në vlerën e 1.7 miliardë lekëve, nga të cilat afro 425 milionë lekë apo 3.5 milionë euro do të përdoren për këtë situatë.
Konkretisht, në vendimet e marra nga qeveria një ditë më parë, të cilat janë botuar në Fletoren Zyrtare dhe kanë marrë fuqi ligjore, 400 milionë lekë i alokohen Ministrisë së Shëndetësisë dhe Mbrojtjes Sociale për marrjen e masave për plotësimin e nevojave paraprake për infeksionin e shkaktuar nga COVID-19, ku 200 milion lekë shkojnë në kategorinë e shpenzimeve kapitale dhe 200 milionë lekë në kategorinë e shpenzimeve korrente.
Ndërkaq, qeveria ka caktuar si vend karantine për të prekurit nga Coronavirusi shtëpinë e pushimit të ushtarakëve në Durrës, dhe për këtë arsye ka akorduar një fond prej rreth 25 milionë lekësh për Ministrinë e Mbrojtjes, për rikonstruksionin e godinës me qëllim përshtatjen e saj si infrastrukturë karantine; blerje mallrash/pajisjesh për përshtatjen e dhomave për nevoja të karantinës; sigurimin e ushqimit të gatuar sipas nevojave dhe sigurimin e shërbimit të lavanderisë.
Këto janë masat e para që merren në kuadër të Covid-19, pasi u shfaqën dy rastet e para të të prekurve, ndërsa do të shihet në vijim nëse do të ketë nevojë për më shumë nevoja financiare dhe përdorimin e mëtejshëm të fondit rezervë.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.