3 deputetë propozojnë në Kuvend amendament për ndryshimin e ligjit për Urdhërin e Punonjësve Socialë
Tre deputetë të mazhorancës kanë depozituar në Kuvend një amendament për ligjin e urdhërit të punonjësve socialë. Amendamenti i tre deputetëve anëtarë të Komisionit të Çështjeve Sociale, Klodiana Spahiu, Ilirian Pendavinji e Erjeta Allhysa synon të rregullojë një situatë të mbivendosur në parashikimet aktuale ligjore të ligjit 163/2014.
“Konkretisht, në nenin 13, pika 2, shkronja “c” ndër detyrat e tjera të Këshillit Kombëtar, parashikohet dhe zgjedhja e Kryetarit të Urdhërit dhe të zëvëndësit të tij. Por në nenin 14 pika 2 parashikohet që Kryetari i Urdhrit të Punonjësve Sociale zgjidhet me votim të fshehtë nga Asambleja, midis jo më pak se dy kandidaturave alternative. Në këto kushte, këto dy parashikime ligjore krijojnë konfuzion dhe paqartësi në zbatimin e tyre, duke patur parasysh situatën dhe procedurën paraprake që do të ndërmerret për organizimin e zgjedhjeve të para të këtij enti publik.
Unifikimi i procedurave të tilla është realizuar në të gjithë urdhërat e tjerë profesionale si urdhri i mjekut, psikologut, etj. ku Kryetari i Urdhërit zgjidhet nga Asambleja e Anëtarëve, pra nuk mundet që këtë zgjedhje ta bëjë një organ tjetër. Për të shmangur mbivendosjen, nëpërmjet këtij amendimi ligjor, propozohet shfuqizimi i shkronjes “c” to nenit 13 për të evituar mbivendosjen e kompetencave. Kjo nismë ligjore nuk sjell rritje të shpenzimeve për buxhetin e shtetit, pra nuk ka faturë financiare” shkruhet në relacionin e propozimit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.