“3 lëndë në 6 orë” – Shahini: Sjell lehtësi, 80% e mësuesve e kanë mirëpritur
Mbi 80% e mësuesve por edhe nxënësve e kanë përqafuar propozimin për zhvillimin e 3 lëndëve mësimore në 6 orë. Kështu është shprehur për televizionin SCAN zv.ministrja e Arsimit Rinisë dhe Sportit, Besa Shahini, e cila ka theksuar se ky udhëzim ndihmon mësuesit dhe nxënësit. Sipas Shahinit nxënësit tashmë nuk do të kenë çanta të rënda por jo vetëm kaq kjo ndihmon edhe në rritjen e cilësisë në arsim.
“Përmes një intervenimi shumë të vogël të riorganizimit të orarit të mund të krijohet një hapësirë ku mësuesit thjesht mund të shpjegojnë më gjatë apo të bëjë edhe aktivitete të tjera që ndihmojnë mbarëvajtjen e mësimit. Nxënësi të ketë më pak lëndë për t’u përgatitur për të nesërmen dhe ajo që është kryesorja, të lirohet pesha e çantave përgjysmë, minimalisht përgjysmë.”
E pyetur nga TV SCAN se përse nuk u pilotua fillimisht ky propozim në një numër të caktuar shkollash? Shahini u përgjigj:
“Në parim secila nismë dhe secili projekt do të pilotohet në një grup shkollash në mënyrë që të shihet mbarëvajtja. Këtu kemi pasur një urgjencë që na u desh me adresu, që ishte pasha e çantave. Edhe te televizioni juaj, por edhe te të gjitha mediat në fakt është diskutuar dhe kemi marrë kritika pa fund që nuk kemi arrit ta zgjidhim këtë si problem. Kështu që, pas bisedave me shumë mësues dhe me shumë prindër ne pyetëm nëse ka nevojë të pilotohet kjo. Drejtorët e shkollave dhe mësuesit thanë që jo, për shkak se është thjesht një riorganizim i lehtë i cili mund të bëhet brenda afateve që kemi caktuar.”
Ashtu sikurse çdo risi edhe ky ndryshim ka sjell skepticizëm në shumë prindër por jo vetëm, lidhur me këtë zv.ministrja siguroi se ky model përdoret edhe në shumë vende të botës, duke shtuar se ora e mësimit 45 minuta kufizon marrjen e njohurive të plota.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.