3 programe të reja për nxitjen e punësimit. Programet 4, 8 dhe 12 mujore. Rama: Shqipëria ka humbur më pak vende pune në rajon
Duke parë pasojat që ka krijuar pandemia në tregun e punës, qeveria ka prezantuar programet e reja të nxitjes së punësimit që shtrihen në 4 mujore, 8 dhe 12 mujor. Programet parashikojnë mbulimin 100 % të pagës dhe kontributeve. Kryeministri Edi Rama në prezantimin e programeve tha se Shqipëria ka humbur më pak vende pune në rajon nga pandemia, dhe se qeveria ju përgjigj në mënyrën e duhur kësaj sfide, por duhet bërë ende më shumë pë rata që nuk janë rintegruar në tregun e punës.
“Programet iu vijnë në ndihmë atyre që kanë nevojë të riintegrohen në tregun e punës. Pavarësisht çfarë flasin, jemi përpara një pasqyre domethënëse të krahasimit të viteve të qeverisë sonë dhe viteve të mëparshme. Rritja ekonomike është shoqëruar me rritje punësimi. Zyra e punës dikur në ministrinë e Punës lëshonte veç lëmosha. Rrjeti i zyrave të punës ishte një rrjet qesharak e skandaloz, godinat ndaheshin me bingo, pub-e e bare që i jepnin vetë drejtorët e tyre me qira. Sot kemi 44 mijë punëdhënës të regjistruar në sistem dhe që do të thotë 44 mijë bashkëpunëtorë të të gjithë rrjetit të zyrave të punës. Për ata që humbën punën në pandemi do kemi 2 fishim të ndihmës ekonomike pas situatës me covid. Kujtojmë që nga qershori 20 mijë prej 30 mijë personave që humbën vendet e punës u ripunësuan. Aplikimet tani për tu ripunësuar bëhen përmes E-Albania, pa asnjë kosto shtesë. Lajm i mirë është që Shqipëria është vendi me më pak vende të humbura pune për frymë se sa vendet e rajonit. Sot jemi duke definuar edhe atë masë që ka qënë një nga objektivat tona vendosja e pagës minimale 30 mijë lekë, kjo masë edhe në sektorin privat. Studimi për një rishikim të taksimit progresiv po vazhdon, do kemi edhe aty zhvillime pozitive. Duke u nisur nga njerëz që s’kanë dëshirë të pranojnë të mirën, progresin që këto masa kanë dhënë që nga korriku kur zeruam taksat dhe TVSH, iu them se kjo nuk ka të bëjë me fushatën. Ne nuk u kujtuam sot, janë të gjitha fryte që merren në kohë pas një pune të gjatë”,- tha Rama.
Të gjithë të interesuarit mund të aplikojnë në këto programe nëpërmjet portalit e-albania. Kryeministri mes të tjerash u ndal edhe te paga minimale, duke thënë se synohet të shkojë në 300 mijë lekë.
Arbër Hitaj / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.