300 mijë pula të ngordhura nga sëmundja – Grip i shpendëve/ Gjeçi: Janë karantinuar stabilimentet, produktet në treg të sigurta

Afro 300 mijë shpendë kanë ngordhur deri më tani nga sëmundja e laringo-trakeit dhe influencës aviare, apo gripit të pulave në dy stabilmente të mëdha shpendësh. Zv. Ministrja e Bujqësisë, Ermira Gjeçi,  ka sqaruar se deri më datën 19 mars në bazë të mostrave të analizuara ishte prezente vetëm sëmundja e laringo-trakeit, ndërsa në datën 19 Mars ka rezultuar se njëri nga stabilimentet është prekur edhe nga grip i shpendëve.  Sipas saj, janë marrë masa të mënjehërshme në karantinimin e stabilimenteve dhe zonës përreth.

Ndërsa, Drejtoresha e autoritetit Kombëtar të Veterinarisë dhe Mbrojtjes së Bimëve, sqaron konsumatorët se nuk ka vend për panik pasi gripi nuk kalon përmes produkteve të konsumuara por nga kontakti direkt me shpendët me virus.

Ministria e Bujqësisë bën me dije se në bashkëpunim me institucionet e tjera dhe pushtetin vendor po merren masa për groposjen e shpendëve të ngordhura,  ndërsa u bën apel konsumatorëve të blejnë vetëm në njësi të licensuara ku produktet janë të kontrolluara nga Autoriteti Kombëtar i Ushqimit.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.