31 mijë legalizime në pritje – Pjetri: Përfundojnë brenda korrikut, qytetarët të informohen pranë hipotekave

Pak javë nga krijimi i Agjencisë Shtetërore të Kadastrës, Kreu i Hipotekave Valdrin Pjetri, thotë se grupimi e institucioneve të të pronës nën një institucion të vetëm do sigurojë një shërbim më cilësor e më të shpejtë për qytetarët. Në një intervistë ekskluzive për TV Scan, Pjetri thekson se Agjencia  do përmirësojë bashkëpunimin dhe koordinimin mes institucioneve, duke i dhënë fund problemeve të mospërputhjes së hartave, të mbivendosjeve apo përplasjeve të titujve, ndërkohë që qytetarët do të marrin çdo shërbim në një sportel.

Zyrat e Regjistrimit të Pasurive kanë adresuar edhe problemin e lejeve të legalizimeve që rrinë në pritje prej vitesh, pavarësisht se kanë përfunduar procesin e miratimit te ALUIZNI. Pjetri thotë se janë evidentuar në total 31 mijë leje legalizimi të paregjistruara në hipotekë.

Ligji për Agjencinë Shtetërore të Kadastrës dhe për përfundimin e proceseve kalimtare të pronës janë në pritje të votohen përsëri në Kuvend, pasi u kthyen për rishqyrtim nga Presidenti i Republikës.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.