38 mijë vende të lira pune – “Lulëzojnë” fasonët! Rrobaqepësia, profesioni më i kërkuar
Shërbimi Kombëtar i Punësimit ka të regjistruar në zyrat e tij të punës të gjithë vendin rreth 38519 vende të lira puna nga 35426 punëdhënës të regjistruar. Ndërsa vetëm në faqen zyrtare on line të këtij institucioni puna.gov.al janë listuar 5718 vende të lira pune, të ofruara nga 557 kompani.
Po të bëjmë një analizë të profesioneve më të kërkuara nga punëdhënësit, duket se industria me fasonë mban rekord dhe është në lulëzim, pasi profesioni rrobaqepës kryeson listën e kërkesave, duke u ndjekur nga kërkesat për punëtor krahu.
Në listën e publikuar on line të vendeve të punës, përgjithësisht mbizotërojnë profilet e ulëta të profesioneve dhe më pak të paguara, çka tregon edhe arsyen se përse qëndron në mënyrë konstante një numër i lartë vendesh të lira pune, për shkak se shumica e të rinjve të shkolluar, kërkojnë profesione që u përshtaten profilit të tyre të arsimimit.
Sanitarë, banakierë, kamarierë, kuzhinierë, saldatorë, shitës dhe shoferë, janë disa nga profesionet e tjera që shfaqen më së shumti në listën e kërkesave të punëdhënësve. Ndërsa profesionet e mirëpaguara si IT apo ekonomisë, i gjejmë shumë rrallë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.