4 mijë të papunë humbin asistencën – SHKP: Nuk u bënë të “gjallë”, refuzuan ofertat
30 për qind e punëkërkuesve të papunë gjatë vitit 2018 janë nxjerrë nga skema e asistencës sociale. Të dhënat zyrtare të shërbimit Kombëtar të Punësimit, bëjnë me dije se nga kategoria e individëve që kanë humbur statusin e punëkërkuesve të papunë, numri i individëve që përfitonin pagesë papunësie është 4,410 persona ose 30% më pak se një vit më parë.
Dhe këtë heqje të ndihmës financiare, ky institucione e argumenton me 3 arsye. Sipas Shërbimit Kombëtar të Punësimit, 59 për qind prej tyre kanë dalë nga skema pasi nuk janë paraqitur në zyrat e punës. “Për këtë arsye në zbatim të ligjit ‘Për punëkërkuesin”, këta individë janë çregjistruar me arsyen ‘Nuk u paraqit në zyrën e punës’. Pjesa më e madhe e Pu.Pa-ve të pa përditësuar janë të mbartur nga vitet e kaluara dhe çregjistrimet janë kryer në mënyrë masive”, thuhet të raport.
Arsye tjetër është refuzimi i ofertave për punë. “Refuzon shërbimin e ofruar’, dhe ‘Nuk kërkon më punë’, përbëjnë 5.4% të peshës së daljeve nga regjistri” citon raporti. Ndërsa 35 për qind e tyre janë punësuar, përmes ndërmjetësimit, kanë gjetur punë vetë apo kanë marrë pjesë në programet e nxitjes. Në total, numri i punëkërkuesve të papunë është ulur me 22%. Rajonet me uljen më të madhe rezultojnë Berati dhe Lezha, përkatësisht me 46% dhe 40%.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.