4 milionë dollarë për sigurimet e jetës dhe sëmundjet – Janar-shkurt 2022, rritet me 36.84% portofoli i mbrojtjes nga aksidentet e shëndetit

Duket se Pandemia ka rritur sensibilizimin e qytetarëve për të siguruar shëndetin. Treguesit flasin për rritje të fortë të këtij portofoli gjatë dy muajve të parë të vitit, në një kohë që trend të njëjtë ka shënuar sigurimi i jetës. Autoriteti i Mbikqyrjes Financiare raporton se të ardhurat nga sigurimet e Aksidenteve dhe Shëndetit, gjatë periudhës janar-shkurt 2022, arritën në rreth 228 milionë lekë, afërisht 2 milionë dollarë duke shënuar një rritje prej 36.84% në krahasim me periudhën janar-shkurt 2021. Ndërkaq, primet nga sigurimet e Jetës gjatë periudhës janar-shkurt 2022, arritën rreth 205 milionë lekë, ose 13.78% më shumë se në të njëjtën periudhë të një viti më pare.

Gjithsesi, edhe për këtë vit, tregu mbetet i orientuar tek sigurimet e Jo-Jetës, të cilat sollën 92.67% të vëllimit të përgjithshëm të primeve, ndërsa sigurimet e Jetës kanë 7.31%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 37.64% dhe primet e shkruara bruto të sigurimit të detyrueshëm zënë 62.36% të totalit të tregut.

Gjatë periudhës janar-shkurt 2022, dëmet e paguara bruto në tregun e sigurimeve, arritën në rreth 840 milionë lekë, afërsisht 8 milionë dollarë, ose 39.87% më pak se në periudhën janar-shkurt 2021, kjo ulje është e ndikuar nga vazhdimësia e  pagesave për dëmshpërblime nga tërmetet e fundvitit 2019 gjatë janar-shkurtit 2021.

Ndërkohë dëmet e paguara bruto në sigurimin motorik për periudhën janar-shkurt 2022 kapën vlerën 623 milionë lekë, duke pësuar një rritje me rreth 0.5% krahasuar me të njëjtën periudhë të një viti më parë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.