4 muaj nga zgjedhjet, zero fushata qeveritare – Drafti i KQZ: Asnjë rritje pagash, pensionesh, legalizim, apo angazhim nga krerët e institucioneve
Komisioni Qendror i Zgjedhjeve ka propozuar një rregullore që t’i ndalojë institucionet publike të angazhojnë nëpunësit apo mjetet për qëllime partiake duke nisur nga 4 muaj përpara zgjedhjeve të 25 prillit. Në draft rregulloren që u është shpërndarë për konsultim subjekteve politike, KQZ përcakton një seri veprimtarish të ndaluara për punonjësit dhe titullarët e institucioneve, por njëherësh ndalon Qeverinë edhe të ndërmarrë vendime që mund t’i sigurojnë avantazhe elektorale, siç mund të jetë rritja e pagave, e pensioneve, heqjen e taksave, amnisti apo privatizime.
“Katër muaj para datës së zgjedhjeve deri në formimin e qeverisë së re pas zgjedhjeve ndalohet propozimi, miratimi ose nxjerrja e akteve ligjore ose nënligjore, të cilat parashikojnë dhënien e përfitimeve për kategori të caktuara të popullsisë, të tilla si aktet që parashikojnë rritjen e pagave, pensioneve, mbështetjes ekonomike apo sociale, uljen ose heqjen e taksave, vendosjen e amnistive fiskale, privatizimin apo dhënien e pasurive a të shpërblimeve, etj., përveçse kur nisma kushtëzohet nga gjendje të fatkeqësisë natyrore”, thekson draft rregullorja e Komisionit Qendror të Zgjedhjeve.
Drafti specifikon se Kryeministri, Ministrat, Kryetarët e Bashkive, apo drejtuesit e ndërmarrjeve shtetërore nuk gjatë periudhës kohore 4 muaj para datës së zgjedhjeve deri në ditën e zgjedhjeve, e kanë të ndaluar të drejtojnë, të marrin pjesë apo në çfarëdolloj forme të kontribuojnë në veprimtari publike me qëllim promovimin e projekteve apo investimeve, shpërndarjen në veprimtari publike të lejeve të legalizimeve; shpërndarjen në veprimtari publike të akteve apo informimin e procedurave për regjistrimin e tokës bujqësore apo çdolloj pronësie tjetër.
Institucioneve u ndalohet vënia në dispozicion e aseteve të luajtshme dhe të paluajtshme që janë në pronësi apo administrim të organeve apo enteve publike, por njëherësh edhe përdorimin e detyruar të administratës shtetërore brenda orarit të punës për veprimtari dhe/ose aktivitete në funksion të zgjedhjeve si dhe përdorimin në mënyrë të detyruar dhe të organizuar brenda orarit mësimor të nxënësve të sistemit shkollor parauniversitar për veprimtari dhe aktivitete në funksion të zgjedhjeve, ose premtimin apo ofrimin e përfitimeve nëpunësve publikë ose nxënësve për të marrë pjesë në veprimtari në funksion të zgjedhjeve, jashtë orarit të punës ose mësimit, si dhe ushtrimin e presionit ndaj tyre për këtë qëllim.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.